గిరిజా కళ్యాణం - రహస్యం

గిరిజా కళ్యాణం - రహస్యం

అంబా పరాకు దేవీ పరాకు
మమ్మేలు మా శారదంబా పరాకు

ఉమామహేశ్వర ప్రసాద లబ్ధ పూర్ణ జీవనా గజాననా
బహుపరాక్ బహుపరాక్
చండభుజాయమండల దోధూయమాన వైరిగణా షడాననా
బహుపరాక్ బహుపరాక్

మంగళాద్రి నారసింహ బంగరుతల్లి కనకదుర్గ
బహుపరాక్ బహుపరాక్
కృష్ణాతీర కూచెన్నపూడి నిలయా గోపాలదేవ
బహుపరా.....క్

అవధరించరయ్యా విద్యల నాదరించరయ్యా
లలితకళల విలువ తెలియు సరసులు
పదింపదిగ పరవశమయ్యే
అవధరించరయ్యా విద్యల నాదరించరయ్యా

ఈశుని మ్రోల హిమగిరి బాల
ఈశుని మ్రోల హిమగిరి బాల కన్నెతనము ధన్యమయిన గాథ
అవధరించరయ్యా విద్యల నాదరించరయ్యా

కణకణలాడే తామసాన కాముని రూపము బాపీ.. ఆ కోపీ
తాపముతీరి కనుతెరిచి తను తెలిసీ
తన లలనను పరిణయమాడిన ప్రబంధము
అవధరించరయ్యా విద్యల నాదరించరయ్యా

రావో రావో లోల లోల లోలం బాలక రావో
రావో రావో లోల లోల లోలం బాలక రావో
లోకోన్నత మహోన్నతుని తనయ మేనాకుమారి
లోకోన్నత మహోన్నతుని తనయ మేనాకుమారి
రాజ సులోచన రాజాననా
రావో రావో లోల లోల లోలం బాలక రావో

చెలువారు మోమున లేలేత నగవులా
కలహంస గమనాన కలికీ ఎక్కడికే
మానస సరసినీ మణిపద్మ దళముల
రాణించు అల రాజ హంస సన్నిధికే

వావిలి పూవుల మాలలు గైసేసి
వయ్యారి నడల బాలా ఎక్కడికే
కన్నారా నన్నేల కైలాస నిలయాన
కొలువైన అల దేవ దేవు సన్నిధికే

తగదిది తగదిది తగదిది
ధరణీ ధర వర సుకుమారీ
తగదిది తగదిది తగదిది
 
అండగా మదనుడుండగా
మన విరిశరముల పదనుండగా
నిను బోలిన కులపావని తానై
వరునరయగ బోవలెనా ...ఆ..ఆ..

తగదిది తగదిది తగదిది ధరణీ ధర వర సుకుమారీ
తగదిది

కోరినవాడెవడైనా ఎంతటి ఘనుడైనా
కోలనేయనా సరసను కూలనేయనా
కనుగొనల ననమొనల గాసి చేసి నీ దాసు చేయనా

తగదిది తగదిది తగదిది ధరణీ ధర వర సుకుమారీ
తగదిది

ఈశుని దాసుని చేతువా అపసద అపచారము కాదా
కోలల కూలెడు అలసుడు కాడూ ఆదిదేవుడే అతడూ
సేవలు చేసి ప్రసన్నుని చేయ
నా స్వామి నన్నేలు నోయీ నీ సాయమే వలదోయీ
ఈశుని దాసుని చేతువా

కానిపనీ మదనా కాని పనీ మదనా
అది నీ చేతకానిపనీ మదనా
అహంకరింతువ హరుని జయింతువ
అది నీ చేతకాని పని మదనా కానీపనీ మదనా

చిలుక తత్తడి రౌత ఎందుకీ హూంకరింతా
వినకపోతివా ఇంతటితో .. వినకపోతివా ఇంతటితో
నీ విరిశరముల పని సరి సింగిణి పని సరి
తేజోపని సరి చిగురికి నీ పని సరి మదనా

చిలుక తత్తడి రౌత ఎందుకీ హూంకరింతా
చిలుక తత్తడి రౌతా

సామగ సాగమ సాధారా శారద నీరద సాకారా
దీనా ధీనా ధీసారా .. సామగ సాగమ సాధారా
ఇవె కైమోడ్పులు ఇవె సరిజోతలు
వినతులివే అరవిందోజ్వలా ఇదె వకుళాంజలి మహనీయా
ఇదె హృదయాంజలి ఈశా మహేశా

సామగ సాగమ సాధారా
దీనా ధీనా ధీసారా .. సామగ సాగమ సాధారా

విరులన్ నిను పూజచేయగా విధిగా నిన్నొక గేస్తు సేయగా
దొరకొన్న రసావతారు చిచ్చరకంటన్ పరిమార్తువా ప్రభూ
కరుణన్ గిరిరాజ కన్యకన్ సతిగా తాము పరిగ్రహింపగా
మరుడే పున రూపున వర్థిలుగా
రతి మాంగల్యము రక్ష సేయరా ప్రభూ.. ప్రభూ.. పతిభిక్ష ప్రభూ

అంబాయని అసమశరుడు నను పిలిచెను వినవో
జనకుడవై ఆదరణగ తనయునిగా జేకొనవో
అంబాయని నను పిలిచెను వినవో

మనమే నీ మననమై తనువే నీ ధ్యానమై
నీ భావన లీనమైన గిరిబాలనేకొనవో
శరణం భవ శరణం భవ శరణం భవ స్వామీ
పరిపాలయ పరిపాలయ పరిపాలయమాం స్వామీ

బిడియపడి భీష్మించి పెళ్ళికొడుకైనట్టి జగమేలు తండ్రికి జయమంగళం
జగమేలు తండ్రికి జయమంగళం
విరులచే వరునిచేకరముచేకొనజేయు జగమేలు తల్లికి జయమంగళం
జగమేలు తల్లికి జయమంగళం

కూచేన్నపూడి భాగవతుల సేవలందే దేవదేవా 
శ్రీ వేణుగోపాలా జయ మంగళం
త్రైలోక్య మందారా శుభమంగళం

చిత్రం -రహస్యం (1967)
సంగీతం - ఘంటసాల
గీతరచన - మల్లాది రామకృష్ణ శాస్త్రి
గానం - ఘంటసాల,బృందం